అరివీర భయంకరులు
మేరలు మీఱు శత్రుల నమేయ పరాక్రమ వహ్నికీలలన్
నీఱుగ జేసి మాతృధరణీ ఋణ మీగెడు దేశభక్తులౌ
వీరజవానులార! అరివీర భయంకరులార! జేతలై
భారతమాత కీర్తి నిల వ్యాప్తిని జేసిరి శౌర్యధుర్యులై.
పులిగమి, పోతరించు నెనుబోతుల పైబడి చంపు రీతి, నా
కలిగొను సింహసంహతి మృగంబుల పైబడి చంపునట్లుగా
చలిమల కోనలందొదుగు శత్రుల నాక్రమణార్థగాములన్
విలవిలలాడగా తఱిమి పీచమడంచిరి శూరసైనికుల్.
క్రూరుల ముష్కరాధముల ద్రోహుల పాక్ చొరబాటు దారులన్
పోరున పారద్రోలిరి యపూర్వ పరాక్రమ సారబాహులై
భారతదేశగౌరవము భాసిలగా మన వీరసైనికుల్;
హారతులిచ్చి నిండుమది స్వాగత గీతిక లాలపింపుడీ !
డా .యస్వీ రాఘవేంద్ర రావు
[కార్గిల్ వీరుదు "రవిప్రసాద్" విగ్రహావిష్కరణ సందర్భముగా
శ్రీవావిలాల సభలో పఠించినవి.]
No comments:
Post a Comment