audio

http://www.esnips.com/doc/2e27b7ac-9938-4b1c-99d6-6182517d796d/2.padyam-teluguvadi-aasti

Friday 30 September 2011



రచన:డా .యస్వీ  రాఘవేంద్ర రావు .


గానం: శ్రీమతి సంగాడి కామేశ్వరి
పెళ్ళికానుక చిత్రం లోని ఆడే పాడే పసివాడ పాట  వరుస


చెంచులక్ష్మి చిత్రం లోని కానగరావా ఓ శ్రీహరి రావా పాట  వరుస

 

ప్రేమలేఖలు చిత్రం లోని రారాదా పాట వరుస

Thursday 29 September 2011

మహిషాసుర మర్దని


 

              మహిషాసుర మర్దని
హరి హర బ్రహ్మ రవి చంద్ర వరుణ శక్ర
వసు కుబేర భూమి ప్రజాపతి యమాగ్ని
వాయు సంధ్యల తేజాల ప్రభవ మంది
"శక్తి" వైతివి మహిషుని సంహరింప.

రాక్షసులు మహాహన కాల చక్షురులును,
అల బిడాలాసిరోమ బాష్కలురు, నుగ్ర
దర్శనులను సైన్యపతి సప్తకము నీవు
చండకోపాన వధియించి "చండి" వైతి.

పార్వతీ కాయమున నుండి ప్రభవ మంది
యజ్ఞభాగం బపహరించు నసురులైన
యల శుంభ నిశుంభుల యసువులంది
"కౌశికి" యనెడు నామంబు గాంచి తీవు.

శీత నగమందు విహరించు మాత ! నీవు
క్రూరులౌ చండ ముండుల క్రోధదృష్టి
గాంచినంతనే నీ మోము కాలమయ్యె
"కాళిక" యను నామంబు ప్రఖ్యాతమయ్యె.

"హవ్యభాగంబు దేవత లందుకొనగ
నసురులార ! ముజ్జగ మిచ్చి యమరపతికి,
పఱచి పాతాళలోకంబు, బ్రదుకు" డనుచు
దూతగ శివు బనిచి "శివదూతి"వైతి.

తామస కామ సంతమస దర్పిత మూర్తులు మత్తచిత్తులై
ఆ మహిషాసురాది హతకావళి జంపితి దుర్గ ! శక్తివై;
ఈ మహి నంతకంటెను నికృష్టుల స్వైర విహారవర్తులన్
ఏమరి యుంట నీకు దగునే ? దహియింపుము కంటి మంటతోన్.

జగతి తల్లు లిద్దఱు సర్వజనుల కరయ
నెమ్మి జన్మ నొసగి సాకు "నమ్మ" యొకతె
యాపద గడవగ శుభము నభయ మొసగి
యల యదృశ్యగతిని గాంచు "నంబ" యొకతె.

"వింధ్యవాసిని"యు, "శతాక్షి", "భీమ", "దుర్గ",
"రక్తదంతి", "శాకంభరి", "భ్రామరి" యను
పేర్ల నవతరింతు వటంచు వింటి మేము
అట్టివేళ నే డాసన్నమయ్యె నమ్మ !

"దుష్ట శిక్షణంబు" ధరణి "శిష్ట రక్ష
ణంబు నవతార లక్ష్య మనంగ వినమె ?
అంబ ! పరమేశ్వరీ ! యిల నవతరించి
మహి నసురుల మర్దించు మమ్మ దుర్గ !

 డా .యస్వీ  రాఘవేంద్ర రావు .

Wednesday 28 September 2011

ఉగాది కవి సమ్మేళనం


చాంబర్ ఆఫ్ కామర్స్, రాజమండ్రి వారి ఆధ్వర్యం లో 
ఉగాది కవి సమ్మేళనం

"నటవిద్యాధర" డా. పీసపాటి

సెప్టెంబర్ 28  "నటవిద్యాధర" డా. పీసపాటి వర్ధంతి సందర్భముగా 
 

 "నటవిద్యాధర" డా. పీసపాటి  

హృద్యంబౌనె పఠింప రాగ కవితాహీనంబుగా పద్యముల్
ఆద్యంతంబు సరాగ డోలికల నోలార్చుంగదా నీదియౌ
పద్యం బో నరసింహమూర్తి ! మధు శశ్వత్పూర్ణకంఠా ! కళా
వేద్యా ! మాన్య "కళాప్రపూర్ణ నటనావిజ్ఞాన పారంగతా !

తగుమాత్రపు రాగంబున
నిగమోచ్చారణ విధాన నిస్తుల నటనన్
తగుహావభావముల నీ
పగిదిన్ పద్యము పఠించు భావుకుడేడీ !

ఏడీ నీవలె హాయిగ
పాడంగల గాయకుండు పండితవర్యా !
చూడగ నా శ్రీకృష్ణుడె
నే డీ ధర నవతరించె నీ రూపమునన్.

నటనంబును తపమంచు నెంచి ధృత నానానవ్యయోగంబులన్
పటు దీక్షన్ పలు హావభావములు నైపథ్యంబు శోధించుచున్
నటనాంభోనిధి పార మందితివి విన్నాణంబు సాధించుచున్
"నటవిద్యాధర !" కొల్లగొంటి వఖిలాంధ్ర ప్రేక్షక స్వాంతముల్.

"బెల్లపుకొండ" తీపియు, మీసపు సొగసు
      మదిగోరె నిను ప్రేమ మాననీయ !
"బందా" కనకపు శోభయు, గానమాధురి
      ప్రీతిగూడె నిను సంగీతరాయ !
"యడవల్లి" వారి యాయత సౌకుమార్యంబు
      పట్టువడె నమేయ భాగధేయ !
"మాధవపెద్ది" సమ్మానార్హమౌ ఠీవి
      పూర్ణంబుగా నబ్బె బుధవిధేయ !
"చతురభినయధురీణ !" సచ్చరిత ! "ఆంధ్ర
పద్యకవితా సదస్సు" సద్భక్తితోడ
చందురున కొక్క నూల్ప్రోగు సరణి సలుపు
సత్కృతిం గైకొనుము "నటచక్రవర్తి !"
డా .యస్వీ  రాఘవేంద్ర రావు .
(ది. ౧౮.౧౦.౧౯౯౩ తేదీని "చింతామణి" నాటకముపైఆంధ్ర  పద్యకవితా సదస్సు నిర్వహించిన సదస్సులొ ముఖ్య అతిథిగాపాల్గొన్న డా.పీసపాటి నరసింహమూర్తిగారికి జరిగిన సమ్మానసభలోగానము చేసినవి.) 



Tuesday 27 September 2011

కవికోకిల

సెప్టెంబర్ 28 కవికోకిల శ్రీ గుర్రం జాషువా జయంతి సందర్భముగా 

 అయిదు తలల నాగేంద్రున కడలిపోయి,
దాని బుసలకు వసివాడు ధరణి గావ
"గబ్బిలము" రచియిచితి వబ్బురముగ
ప్రజల నాల్కల తిరముగ బ్రతుకు "సుకవి !"
డా .యస్వీ రాఘవేంద్ర రావు

 హరిశ్చంద్ర పద్యాలు,గానం : శ్రీ సంగాడి గంగ రాజు

రమ్యగుణ మహాంధ్రి రాణ్మహేంద్రి

27/09/2011 ప్రపంచ పర్యాటక దినోత్సవం సందర్భముగా


                రమ్యగుణ మహాంధ్రి రాణ్మహేంద్రి

జీవనాధార పుణ్యగోదావరీ
దీ మతల్లిక యొడిలోన తృప్తి తీర
అమృత తుల్య సుస్వాదు పయస్సు లాని
రాణకెక్కితివి మహాంధ్రి రాణ్మహేంద్రి !

ఆంధ్ర వాణీబాల కక్షరాల్ నేర్పిన
       "యాచార్య నన్నయ్య " కమ్మ వీవు,
ఆంధ్ర ప్రభుత్వంపు టాస్థాన కవియైన
      ఖ్యాతుదౌ "శ్రీపాద" మాత వీవు,
లలిత హాస్య రసమ్ము నొలికించు "చిలకమ
      ర్తి"ని గన్న యుత్తమ జనని వీవు,
ఖండాంతర ఖ్యాతిగను కళాకారుదౌ
       "దామెర్ల" కున్ కన్న తల్లి వీవు,
ఆదికావ్య సృష్టి కాధారభూతుదౌ
"రాజరాజ" విభుని రాణి వీవు,
సకల కళలనిధివి, సద్గుణాల పృథివి !
రమ్యగుణ మహాంధ్రి ! రాణ్మహేంద్రి !
ఏ మహనీయు డీవి వెలయించి సమున్నత విద్య నిల్పెనో,

ఏ మహనీయు డాత్మ నలరించు శతాధిక కావ్య కర్తయో,
ఏ మహనీయు ధీపటిమ నింతుల వంతలు దూరమయ్యెనో,
ఆ మహనీయు,పూజ్యకవి, యా యుగ పూరుషు కంటి వమ్మరో !

ఉరముం జూపి తుపకి గుండులకు, రౌద్రోదేక దాక్షిణ్య సం
భరితాత్మన్ "సయిమన్ కమీష" నను పెన్బామున్ నిరోధింపగా
వర ధైర్యంబను మంత్రముం గొనిన శశ్వత్కీర్తియౌ "నాంధ్రకే
సరి"కిన్ మాతవు రాణ్మహేంద్రి ! కొనుమా సమ్మన భవ్యాంజలిన్.

"భమిడిపాటి" , "మద్దూరి", "న్యాపతి", "రఘుపతి",
"బ్రహ్మజ్యోస్యుల", యల "దేరాజు", "నేదు
నూరి" ముఖ్యులు నీదు కుమారులమ్మ !
మఱల గత వైభవమ్ముల వఱలుమమ్మ !

ప్రాజ్యవైభవ నిధులు, వాణిజ్యపరులు,
దానకర్ణులు, కవితా కళానిరతులు,
నీదుగారాబు కొమరులై నెగడుచుండ
చిరతర యశమ్ము గనుము,జేజేలు గొనుము. 
డా .యస్వీ  రాఘవేంద్ర రావు .

గోదావరి మాత

ఇస్కాన్ టెంపుల్  
కోటిలింగేశ్వర స్వామి గుడి  
ఉమా మార్కండేయ స్వామి గుడి
వేణు గోపాలస్వామి గుడి
గౌతమీ లైబ్రరీ 
సారంగధరేస్వరుని గుడి
రాజరాజనరేంద్రుడు 

 
శ్రీ కందుకూరి వీరేశలింగం పంతులు
శ్రీ చిలకమర్తి లక్ష్మి నరసింహం పంతులు 
శ్రీ రఘుపతి వెంకట రత్నం నాయుడు 
శ్రీ న్యాపతి సుబ్బారావు పంతులు 
శ్రీ టంగుటూరి ప్రకాశం పంతులు 
శ్రీపాద కృష్ణమూర్తి శాస్త్రి 
దామెర్ల రామారావు 

Monday 26 September 2011

స్వర్ణ భారతి

ఆంధ్ర కేసరి యువజన సమితి ఆధ్వర్యం లో



పరదాస్యమున మ్రగ్గి మ్రగ్గి త్రిశతాబ్దంబుల్ విశాలావనీ
కరుణావేశ మహార్త "భారతి" మహోగ్ర క్రోధయై పిల్వగన్
చరణాగ్రంబుల మోకరిల్లి తనుజుల్ సంకెళ్ళు త్రెళ్ళింపరే
యరుదైనట్టి సమీకమున్ సలిపి సత్యాహింస నాద్యాయుధుల్.

ప్రగతి పథమందు నడిపింప ప్రాజ్ఞవరులు
చేరి స్వాతంత్ర్య రథమున సారధులయి
వర్ణమత సామరస్యమ్ము పరిఢవింప
భరత రాజ్యాంగ నిర్మాణ గరిమ గనిరి.

దేశమునకు వెన్నెముకలై తేజరిల్లు
గ్రామసీమల యందె భారతము గలదు
పంచవర్ష ప్రణాళికా ప్రథమవేళ
వ్యావసాయికరంగాభివర్ధనమ్ము
లక్షితంబయ్యె శ్రీరామ రక్ష గాగ.

నాగార్జున సాగరమా
సాగుకు తెచ్చెను పొలాల సస్యము లడరన్
నాగలి సాగెను రైతుకు,
మ్రోగెను జీవన విపంచి మోహన గీతుల్.

"పారిశ్రామికవృధ్ది గాంచినపుడే ప్రాప్తించు నుద్యోగముల్
ధారాళంబుగ దేశమందు" నని, నేతల్ దేశముల్ తోడ్పడన్.
ఆరంభించిరి నేర్పుమై నినుప కర్మాగార నిర్మాణముల్
తోరంబయ్యె నుపాధి కల్పనము చేతోమోద మేపారగన్.

దూరదర్శనంబు దూరశ్రవణమును
సులభమయ్యె భరత సుతులకెల్ల
"ఆర్యభట్టు" మెఱసె నంతరిక్షంబున
చమురు నాగలోక చరిత దెలిపె.


"విశ్వకవి" రవీంద్రు విదిత గీతాంజలి.
      "జాతిపిత" నితాంత సత్య నిరతి,
"జగదీశచంద్రు" వృక్ష పరిశోధన కృషి.
      "సీ.వి. రామను" శాస్త్ర జీవనమ్ము,
"నేతాజి" "జైహిందు" నినద మహార్భటి,
      తనరు "రాధాకృష్ణు" తత్త్వబోధ,
"జైజవాన్! జైకిసాన్!" "శాస్త్రి" నినాదంబు,
      "రామానుజన్" గణితామరతయు
భూషణమ్ములు గాగ నీ పొలుపు మీరె
ఖండ ఖండాంతరాల విఖ్యాతు లడరె,
"అర్ధశత" వసంతాల సోయగము నీది
"స్వర్ణ భారతీ!" వర్ధిల్లు భావి జగతి
మన మనుభవించు "స్వాతంత్ర్య ఘనఫలమ్ము"
అమరులౌ దేశభక్తుల త్యాగఫలము
.దీని రక్షణ బాధ్యతన్ బూనవయ్య !
సోదరా ! భావిభారత జ్యోతి వీవు.

"శాంతి ! శాంతి !" యం చణుపరీక్షల నొనర్త్రు,
"భాయి ! భా" యంచు చెరుతురు పంచశీల,
జిహ్వపై మధువు, విషము చిత్తమున; ప్ర
పంచతంత్రము చిత్ర స్వభావ భరము.

నాడు "స్వప్న విహంగ"మై నడచినావు,
నేడు "స్వేచ్ఛాతరంగ"మై నెగడినావు,
"స్వర్ణభారత రథ మిదె సాగి వచ్చె,
ప్రగతి పథమందు నడిపించు "భావి జగతి."
డా .యస్వీ  రాఘవేంద్ర రావు .

Saturday 24 September 2011

జన్మభూమి

జన్మభూమి 

జన్మ భూమి గేయం రచన: డా .యస్వీ రాఘవేంద్ర రావు .జిల్లా స్థాయి పోటీలలో ప్రథమ బహుమతి పొందినది 



Friday 23 September 2011

మన భాష-మన సంస్కృతీ-మన-కర్తవ్యం

సాహితీ కౌముది త్రై మాస పత్రిక జనవరి 2011 సంచిక నుండి 
మన భాష-మన సంస్కృతీ-మన-కర్తవ్యం