ఆదికవికి అక్షరాంజలి

        ఆదికవికి అక్షరాంజలి
ఆంధ్రవాణీబాల కక్షరాల్ నేర్పిన
       దివ్యుడౌ నాచార్యదేవుడెవడు?
తెలుగు కవిత్వంపుతీవను నాటిన
        యలనాటి కవికృషీవలు డెవండు?
"తన కులబ్రాహ్మణుం"డని మెచ్చు ఱేనికి
         వేదసూక్తమ్ములు వినిచె నెవడు?
పంచమశ్రుతియైన భారతకృతిగీతి
          పాడి విన్పించిన ప్రోడ యెవ్వ
డట్టి "వాగనుశాసను", నవిరళ జప
హోమతత్పరు", "సద్గుణధాము" "ననఘు",
"సకల వేదవిదుని", "నిత్య సత్యవచను",
నన్నపార్యుని ఋషికల్పు సన్నుతింతు.

"భారత రణమున నరునకు
నారాయణునట్లు నాకు నారాయణభ
ట్టారకుదు తోడ్పడె మహా
భారతరచనంబున" నని పల్కితి వనఘా !

ఆతడెట్టి సాయ మందించెనో గాని
నీ కృతజ్ఞతలను నెఱపుకొన్న
తీరుజూడ మీదు తియ్యంపు నెయ్యంబు
తేటతెల్లమయ్యె మేటి సుకవి !

గౌతమీ వాహినీ గతి గలదయ్య నీ        
        కమనీయ కళ్యాణ కావ్య కన్య,       
సుప్రసన్నార్థ సుశోభితయయ్య నీ            
         కమనీయ కళ్యాణ కావ్య కన్య,          
అక్షర రమ్యత నలరించునయ్య నీ
          కమనీయ కళ్యాణ కావ్య కన్య,
రుచిరార్థ సూక్తులన్ పచరించునయ్య నీ
           కమనీయ కళ్యాణ కావ్య కన్య,
సరళ సంస్కృత పద , సర్వశాస్త్ర విషయ
తెల్గువారి యాడపడుచు, దివ్య కీర్తి !
ఇన్ని గుణముల అన్నుల మిన్న! నీదు
కీర్తి కాయంబు నిల్పిన మూర్తి కాదె?

రాజమహేంద్రి ధన్య, కవిరాజ మిముంగని; ధన్యుడయ్యె నా
రాజనరేంద్రు డాశశివిరాజిత కీర్తి సమార్జనంబునన్
తేజమునొంది రాంధ్రులు త్వదీయకృతిన్; గయికొమ్ము భక్తి నీ
రాజనముల్ బుధావళి నిరంతర మర్చన సేయు నిమ్ములన్.

 శబ్దములు వత్తులుగజేసి, సరస రుచిర
 భావగరిమ స్నేహార్ద్రత పదను జేసి,
 పద్య దీపావళిని నేత్రపర్వముగను
 భారతాకాశవీధిలో పాదుకొల్పి
 తొలి తెలుగు వెల్గునింపిన యలఘుమూర్తి !
 అందుకోవయ్య మా యక్షరాంజలులను

[శ్రీ దుందుభి నామ సంవత్సర దీపావళి పర్వ దినమున౧౫వ జాతీయ గ్రంథాలయ వారోత్సవముల సందర్భమున శ్రీ గౌతమీ ప్రాంతీయ గ్రంథాలయమువారు నిర్వహించినకవిసమ్మేళనమును పురస్కరించుకొని రచించ్నవి]

డా .యస్వీ  రాఘవేంద్ర రావు .