"వేంగీమహాజాని" రాజరాజనరేంద్రుడు

                "వేంగీమహాజాని" రాజరాజనరేంద్రుడు

విమలాదిత్య తనూజ !రాజిత మహావేంగీ మహాజాని !పం

చమవేదప్రథితాంధ్రభారత మహా సత్కావ్యకర్త్రాశ్రయా !

హిమవజ్జావర నిత్యపూజన తపస్వీ ! రాజరాజాహ్వయా !

అమృతాకార !చళుక్యరాజ !కొనుమయ్యా ! సన్నుతుల్, హారతుల్.

పంచమవేదమై పరగు భారతమున్ నన్నపార్యుడన్

ప్రాంచిత సత్కవీశకృషికాగ్రణి నీ యభిలాష మెరకున్

గాంచడె తెల్గునేలతొలికావ్యపు పంటను, రాజరాజ ! కా

మించుయశోలతాంగి నిను, మించెడు దక్షపురీశ్వరాదృతిన్.

ఘనమణిదీప్తి కంకణము, కంకణదీప్తిని రత్న మెవ్విధిన్

మనునొ విశేషశోభగని; మానితకీర్తిని నన్నపార్యుడున్

గనె నటు నీదు ప్రాపుగని; కాంచితి వీవు చిరప్రశస్తి నా

తని కృతి భారతంబుగొని, దక్కె యశోనిధి రాణ్మహేంద్రికిన్

దనరెడు గంధభూరుహపుతావులు భూమికి నబ్బునట్లుగన్.

రాజమహేంద్రి ధన్య, కవిరాజ ! మిముంగని; ధన్యుదయ్యె నా

రాజనరేంద్రు డాశశివిరాజిత కీర్తిసమార్జనంబునన్

తేజమునొంది రాంధ్రులు త్వదీయ కృతిన్; గయికొమ్ము భక్తి నీ

రాజనముల్ బుధావళినిరంతర మర్చనసేయు నిమ్ములన్
డా .యస్వీ  రాఘవేంద్ర రావు .

[శ్రీవేంకటేశ్వర ఆనం కలాకేంద్రంలోరాష్ట్ర సాంస్కృతిక శాఖచే౧౯౯౬ సం.

అక్టోబరు ౪,౫,౬ తేదీలలోనిర్వహింపబడిన "చాళుక్య ఉత్సవాల" లో

భాగంగా ది,౫,౧౦,౧౯౯౬ తేదీని "తెలుగు విశ్వవిద్యలయం"సాహిత్య

పీఠాధిపతి ఆచార్య సి..రమణయ్యగారి ఆధ్వర్యవంలో నిర్వహింపబడిన

"కవిసమ్మేళనం" లో గానం చేసినవి.]