సుమశ్రీ

Tuesday, 3 July 2012

డా.నండూరి రామకృష్ణమాచార్య

సీ|| అధికారభాషాసమాఖ్య కధ్యక్షుడై

మాతృభాషనుగొల్చు మాన్యుడెవడు ?

"శీర్ణమేఖల" వంటి చిరకీర్తియుతమైన

కావ్యాలు వ్రాసిన కవి యెవండు ?

"అతిథిదేవోభవ!" యని యాదరించిన

మృదులహృదయ గృహమేధి యెవడు ?

తెలుగు పద్యమనిన, తెలుగు సంస్కృతి యన్న

మూపులు మూరెడౌ మూర్తి యెవడు ?

తే|| అట్టి మాతృభాషామూర్తి, కట్టి సుకవి,

కట్టి యాచార్యవర్యున, కట్టి ఘనున

కార్ష సంస్కృతి స్ఫూర్తి, కట్టి రామ

కృష్ణమాచార్యులకు నేను కేలు మోడ్తు.

తే|| సాంద్రకీర్తి ! నండూరి వంశాబ్ధిచంద్ర !

సార్థకంబయ్యె నీజన్మ సచ్చరిత్ర !

సుకవి ! జీవింపు ప్రజల నాలుకలయందు

అందుకోవయ్య ! నాదు శ్రధ్ధాంజలిదిగొ !

డా.యస్వీ రాఘవేంద్ర రావు

(డా||నండూరి రామకృష్ణమాచార్య సంస్మరణసభ ది.౨౭.౭.౨౦౦౩ తేదీని

రాజమండ్రి గౌతమీ గ్రంథాలయంలో నిర్వహింపబడింది. ఆసందర్భంగా

పఠించినవి.)

audio